حکومت معیشت کی دوبارہ بحالی کے چیلنج سے نبرد آزما ہونے کیلئے پر عزم ہے‘ہمایوں اختر خان

امداد کی شفافیت کے ساتھ تقسیم کو یقینی بنانے کیلئے سخت جانچ پڑتال کا میکنزم بنایاگیا ہے۔

حکومت معیشت کی دوبارہ بحالی کے چیلنج سے نبرد آزما ہونے کیلئے پر عزم ہے‘ہمایوں اختر خان

لاہور (عالمین نیوز)پاکستان تحریک انصاف کے سینئر مرکزی رہنما وسابق وفاقی وزیر ہمایوں اختر خان نے کہا ہے کہ کوروناوائرس کے اثرات کی زد میں آنے والے طبقات کو ریلیف کی فراہمی اور معیشت کی دوبارہ بحالی بڑا چیلنج ہے لیکن حکومت اس کیلئے پرعزم ہے،مشکل کی اس گھڑی میں اپوزیشن کو جو کرداراداکرناچاہیے تھااس نے وہ ادانہیں کیا،امداد کی شفافیت کے ساتھ تقسیم کو یقینی بنانے کیلئے سخت جانچ پڑتال کا میکنزم بنایاگیا ہے۔ ان خیالات کااظہارانہوں نے حلقہ این اے 131سمیت وسطی پنجاب سے تعلق رکھنے والے پارٹی رہنماؤں سے گفتگو کرتے ہوئے کیا۔ ہمایوں اخترخا ن نے کہا کہ پاکستان کا شمار ترقی پذیر ممالک میں ہوتا ہے لیکن اس کے باوجود وزیر اعظم عمران خان نے کوروناوائرس کے اثرات کی زدمیں آنے والے غریب طبقات کو ریلیف کی فراہمی کے لئے وسائل کی کمی کو آڑے نہیں آنے دیا اور انشااللہ جب تک یہ اپنے پاؤں کھڑے نہیں ہو جاتے حکومت اپنی ذمہ داری سے پیچھے نہیں ہٹے گی۔ انہوں نے کہا کہ معیشت کی بحالی اوراس کے پہیے کو دوبارہ اسی رفتار سے گھمانا بڑا چیلنج ہے لیکن حکومت اس کیلئے پرعزم ہے اور اس کے لئے پیشگی اقدامات شروع کر دئیے گئے ہیں، تعمیراتی شعبے کوصنعت کا درجہ دینا،برآمدی اور زراعت سمیت دیگر شعبوں کے لئے اربوں روپے کا پیکج اسی سلسلے کی کڑی ہے۔ہمایوں اخترخان نے کہا کہ اپوزیشن نے مشکل کی اس گھڑی میں قوم میں اتحاد پیدا کرنے کی بجائے تقسیم پیدا کرنے کی کوشش کی۔ حکومت کے بروقت اقدامات کو سراہنے کی بجائے اپنی سیاست کو چمکانے کیلئے ”میں نہ مانوں“ کی رٹ لگائی گئی جس سے ان کا عوا م میں چہرہ بے نقاب ہوچکاہے۔