ایک مفرور مجرم کی جانب سے دوسروں کو جیل بھرنے کے تلقین منافقت کی اعلیٰ، ارفع اور تابناک مثال ہے: فیاض الحسن چوہان

نواز شریف فرار کی حالت میں بھی ایک آئینی حکومت کے خلاف غیر آئینی سازشیں کر رہے ہیں جولائی کے مہینے میں بیرونِ ملک پاکستانیوں نے ریکارڈ 2.7 بلین ڈالر کی ترسیلات زر پاکستان بھیجیں: فیاض الحسن چوہان

ایک مفرور مجرم کی جانب سے دوسروں کو جیل بھرنے کے تلقین منافقت کی اعلیٰ، ارفع اور تابناک مثال ہے: فیاض الحسن چوہان

لاہور : وزیرِ اطلاعات پنجاب فیاض الحسن چوہان نے نواز شریف کی جانب سے مولانا فضل الرحمان سے ٹیلیفونک رابطے کے ذریعے اپوزیشن کو متحد ہونے اور نیب پیشیوں کی بجائے ہڑتال پر جانے اور جیل بھرو تحریک چلانے کے مشورے پر اپنے ردعمل میں کہا ہے کہ ایک مفرور مجرم کی جانب سے دوسروں کو جیل بھرنے کے تلقین منافقت کی اعلیٰ، ارفع اور تابناک مثال ہے۔ نواز شریف خود تو ''دس بہانے کر کے لے گئی دل'' کے مصداق پتلی گلی سے جیل سے بچ کر لندن بھاگ گئے، لیکن اپوزیشن کو آنکھوں دیکھا زہر کھانے کی تعلیم، تلقین اور تربیت دے رہے ہیں۔

فیاض الحسن چوہان نے کہا کہ مولانا فضل الرحمان کے پاس رتی برابر بھی عقل ہوئی تو وہ (ن) لیگ اور پیپلز پارٹی کی ناجائز سیاسی خواہشات کی تکمیل کے لیے اپنا کندھا استعمال نہیں ہونے دیں گے۔ انہوں نے کہا کہ لگتا ہے نواز شریف اور بیگم صفدر اعوان نے شہباز شریف، حمزہ شہباز اور غیر متحدہ اپوزیشن کی سیاست کا گلا گھونٹنے کی ٹھان لی ہے تبھی نواز شریف مفرور ہو کر بھی انہیں پاکستان کی آئینی حکومت کے خلاف غیر آئینی اقدامات پر اکسا رہے ہیں۔

وزیرِ اطلاعات پنجاب فیاض الحسن چوہان نے مزید کہا کہ اپوزیشن جان لے! عوام اب انکی چالوں اور سازشوں سے پوری طرح واقف ہو چکی ہے۔ انہوں نے بتایا کہ رواں مالی سال کی پہلے مہینے میں بیرونِ ملک پاکستانیوں نے 2.7 بلین ڈالر کی ترسیلات زر پاکستان بھیجیں۔پاکستان کی تاریخ میں کسی بھی ایک مہینے میں ترسیلات زر کے ذریعے بھیجی گئی یہ سب سے بڑی رقم ہے۔ فیاض الحسن چوہان نے کہا کہ یہ وزیراعظم عمران خان اور پی ٹی آئی حکومت کی نیک نیتی اور ایمانداری پر عوام کے اعتماد کا ثبوت ہے۔