شبلی فراز کا سیکریٹری جنرل اقوام متحدہ کے بیان کا خیرمقدم

سماجی رابطے کی ویب سائٹ ٹوئٹر پر ایک بیان میں وفاقی وزیرِ اطلاعات سینیٹر شبلی فراز نے کہا کہ یہ بات خوش آئند اور ہمارے مؤقف کی جیت ہے

شبلی فراز کا سیکریٹری جنرل اقوام متحدہ کے بیان کا خیرمقدم

وفاقی وزیر اطلاعات سینیٹر شبلی فراز نے اقومِ متحدہ کے سیکریٹری جنرل انتونیو گوتریس کی جانب سے مسلمانوں کے حق میں دیئے گئے بیان کا خیر مقدم کیا ہے ٹوئٹر پر ایک بیان میں وفاقی وزیرِ اطلاعات سینیٹر شبلی فراز نے کہا کہ یہ بات خوش آئند اور ہمارے مؤقف کی جیت ہے۔انہوں نے کہا کہ سیکریٹری جنرل اقوام متحدہ انتونیو گوتریس کا اسلامو فوبیا کے تدارک کو ترجیح دینے کا خیر مقدم کرتے ہیں۔

وفاقی وزیرِ اطلاعات نے مزید کہا کہ کورونا وائرس کو مسلمانوں کے ساتھ منسوب کرنا نفرت پر مبنی بھارتی انتہا پسند سیاسی جماعت بی جے پی کی سوچ کی عکاسی ہے شبلی فراز کا یہ بھی کہنا ہے کہ بھارت میں مسلمانوں کے خلاف انتہا پسندانہ رویہ انسانی حقوق کی پامالی ہے۔

واضح رہے کہ انتونیو گوتریس نے اسلامی ممالک کی تنظیم کے اقوامِ متحدہ میں رکن ممالک کے ورچوئل اجلاس سے خطاب کرتے ہوئے کہا ہے کہ مسلمانوں کے خلاف نفرت اور اسلامو فوبیا کا خاتمہ اقوامِ متحدہ کی پہلی ترجیح ہے انہوں نے کہا کہ وہ اس بات سے مکمل اتفاق کرتے ہیں کہ اس کا مکمل جائزہ لیا جانا چاہئے کیونکہ یہ عالمی امن و سلامتی کے لیے خطرہ ہے۔